Участие центра в психологической выставке EXPO 2018
Մայիսի 15-ին «ԱՅԳ» հոգեբանական ծառայությունների կենտրոնը մասնակցեց թվով 9-րդ «Հոգեբանական վերնիսաժ EXPO 2018» ցուցահանդեսին։ Ամենամյա այս միջոցառման կազմակերպիչն էր ԵՊՀ Փիլիսոփայության և հոգեբանության ֆակուլտետի Ընդհանուր հոգեբանության ամբիոնը, որն այս տարի իրականացրեց նաև հոգեբանության ոլորտում առաջին «PSY AWARDS» մրցանակաբաշխությունը։
Ցուցահանդեսին մասնակցում էին հոգեբանության ոլորտում գործունեություն ծավալող կենտրոններ, հոգեբանական կրթություն իրականացնող հաստատություններ, մասնագիտացումներ առաջարկող կրթական համակարգեր:
«ԱՅԳ» հոգեբանական ծառայությունների կենտրոնը, մեծ կարևորություն տալով ուսանողների հետ սերտ համագործակցությանն ու նրանց ներուժի դրսևորման համար արդյունավետ հարթակի ստեղծմանը, EXPO-ի շրջանակներում հանդես եկավ մի քանի առաջարկներով՝
• Ուսանողական, աշխատանքային պրակտիկա՝ անհատական և խմբային ձևաչափերով
• Կամավորական աշխատանք՝ խոցելի խմբերի հետ իրականացվող հոգեբանական ծրագրերի մեջ
• Որպես հոգեբան-խմբավար հանդես գալու հնարավորություն՝ կենտրոնում գործող «Հոգեբանական ակումբի» շրջանակներում
• Կենտրոնի թրեյնինգներին և դասընթացներին մասնակցություն՝ ուսանողների համար նախատեսված հատուկ զեղչային համակարգով
EXPO-ի մասնակից ուսանողներն ու նորավարտ մասնագետները մեծ ոգևորությամբ արձագանքեցին կենտրոնի ընձեռած հնարավորություններին՝ հանդես գալով նաև իրենց առաջարկներով, համագործակցության սեփական պատկերացումներով։
«ԱՅԳ» հոգեբանական ծառայությունների կենտրոնը մեծապես ողջունում է նման միջոցառումների կազմակերպումը հոգեբանության ոլորտում և շնորհակալություն հայտնում «Հոգեբանական վերնիսաժի» կազմակերպիչներին՝ հոգեբանական կենտրոն-ուսանող երկխոսությանը նպաստելու և գործող կենտրոնների միջև համագործակցային նոր կապերի հաստատմանը աջակցելու համար։
